نەتەوە یەکگرتووەکان: لە کۆتایهێنان بە قۆناغی ڕزگارکردن نزیک بووینەتەوە لە تورکیادا
نەتەوە یەکگرتووەکان: لە کۆتایهێنان بە قۆناغی ڕزگارکردن نزیک بووینەتەوە لە تورکیادا
جێگری سکرتێری گشتی نەتەوە یەکگرتووەکان، بۆ کاروباری مرۆیی و بەهاناوەچوونی دۆخی لەناکاو، (مارتن گریفس) ئاشکرایکرد کە پڕۆسەی ڕزگارکردن و بەهاناوەچوونی ئەوانەی لەژێرداروپەردووی ڕووخاوی باڵەخانەکاندا ماون، لە قۆناغی کۆتایی نزیکبووەتەوە.
مارتن گریفس لەمیانەی سەردانێکی مەیدانیدا بۆ پارێزگای قارەمان مارشی باکووری کوردستان، ڕایگەیاند:”لە کۆتایهاتنی قۆناغی ڕزگارکردن نزیکبووینەتەوە، لێرە بەدواوە پرۆسەی چاککردنەوە و بوونیادنانەوە، پلاندانان بۆ دروستکردنەوەی خانوو باڵەخانەکان دەست پێدەکات”.
سکرتێری گشتی نەتەوە یەکگرتووەکان، بۆ کاروباری مرۆیی و بەهاناوەچوون، باسی لەوەشکرد کەپرۆسەی بوونیادنانەوەی تورکیا پشت دەبەستێت بەئاستی ئەو هاوکارییە مرۆییانەی پێشکەشی تورکیا دەکرێت. ئاماژەی بەوەشکرد کەڕۆڵی حکومەتی تورکیا زۆر گرنگ دەبێت بۆ قۆناغی بوونیادنانەوە و ئاسایکردنەوە و گەڕانەوەی ژیان بۆ ئەو شوێنانەی دووچاری کارەساتەکە بوون، ئێمەش لای خۆمانەوە داواکاری بۆ کۆکردنەوەی هاوکارییەکان ڕادەگەیەنین، بۆ پشتیوانی تورکیاو هاوکاری هەمو ئەو کەسانەی لەو کارەساتەدا زیانیان بەرکەوتووە.
